Situada en San Vicente do Mar, esta andaina comeza no porto deportivo de Pedras Negras e discorre por pasarelas de madeira a beira do mar, adaptándose ao terreo e marcada por grandes pedras esculpidas pola erosión.

Percorre as praias de Burato da Londra, Farruco e A Barrosa, e continúa entre rochas pasando pola cala de Fervide. Ao longo do paseo de madeira atopamos uns bancos que nos permiten parar e gozar con calma das vistas, dominadas polas illas de Ons, que forman parte do Parque Nacional Marítimo-Terrestre das Illas Atlánticas.

O paseo remata no miradoiro da praia de Canelas, xusto antes de chegar a unha antiga batería militar.